論盡音樂
2021年7月29日
7.5 分，好似好多人都大跌眼鏡。
首先， 7.5 分其實都係一個比平均高嘅分數，只不過柳應廷之前歌曲分數真係好高，先顯得呢一首好似比較差。當然，響五首派台歌入邊，《砂之器》的確係相對遜色嘅一首。
好多人都話呢首歌難唱，但我覺得《狂人日記》嘅狂同放其實比較難，與此同時，《狂人日記》唱得比《砂之器》好。《砂之器》中，聽到柳應廷嘅聲音比較沙，唔知係故意，定抑或係工作過後嘅疲勞。另外，我明白歌曲需要好多感情去處理，但唱法上到後段好似冇乜力度再推進，或者前邊段落放得太盡，令到鋪排唔夠明顯。歌手絕對需要知道自己聲音能力限制響邊個位，再去計算每個段落用聲能唔能夠做出層次，希望將來柳應廷可以更加注重響呢一方面嘅功課。
另外，關於呢個題材嘅寫法，我係有保留。
首先，過去柳應廷四首作品，每一首歌結尾都留有一個開放式結局俾大家去思考。例如《水刑物語》入面嘅主角望到嘅光，係死亡帶來定希望帶來呢？《狂人日記》入面，主角一家最後會演變成點嘅結果？每首歌留咗一個伏線，去引領聽眾思考歌曲當中意義。然而，《砂之器》卻由歌曲到 MV 都如同留下結局。
「用自己方式去愛自己愛嘅人，而對方卻感受唔到自己嘅好意。」歌曲其實開咗一個相當好嘅題目，甚至，最後寬恕係一個完美結果，但偏偏呢件事情過於完美，變得唔真實。唔係話我嘅家庭有咩缺失，令到我有呢個想法，而係家中成員嘅關係之間，嗰種牽絆絕對唔係所謂原諒或者擁抱，然後接受就會完結，當中嘅「宿命」牽涉到千絲萬縷嘅感情，其實有好多值得深思以及反思嘅空間，就一如柳應廷之前作品嘅結尾一樣。但今次呢個題目，能夠引起好多想法之時，最後卻幫大家寫下結局，哪怕再感人，都會顯得唔真實，因為「一家唔知一家事」，同樣問題，大家解決方式都有千萬種，而《砂之器》係縮窄大家對歌曲嘅反思空間。
另外一點我都講過好多次，就係我唔太喜歡創作者將一份歌詞，響歌曲派台後短期內，就仔細地去拆解。其實好多時候，可以比聽眾先感受一下，就算歌名再懸疑，題目再艱難，有興趣嘅人自然會擁有自己解讀，甚至上網去討論，或者搜尋相關學識。太快揭曉，就有種上秒問完 IQ 題，大家未開始諗，下一秒主持人就公布答案一樣，係幾冇癮嘅。
雖然我唔喜歡創作者太快拆解自己作品，但對於編曲，我永遠覺得編曲人係好應該多講自己編曲想法。因為香港人聽歌，其實好著重編曲，因為係第一次聽覺得入唔入耳嘅重點。但同時，大多香港人又唔認識編曲係一件咩事，所以當我見到王雙駿解說嘅時候，我係從中可以學到好多嘢，希望大家都可以上返去王雙駿 IG ，睇吓佢講解有關《砂之器》編曲嘅故事。
當然，王雙駿嘅編曲真係好厲害，由第一下嘅聲音，就連接《狂人日記》最後一個字「狂」嘅音一樣佢開始《砂之器》，將上一生嘅故事延續到今生，想法做法都相當令人佩服。後面陸續而來嘅氣勢，以及只聽編曲都感受到嘅沉重，令呢首歌嘅氣氛好立體。
縱然歌曲得 7.5 分 ，但係其實已經好過好多歌手嘅作品。我希望柳應廷可以繼續努力，同佢嘅音樂團隊去創作更多令我哋去思考嘅作品，咁樣先係適當地運用大眾對自己嘅關注度，呢件事對於一位偶像黎講都好重要架！
《砂之器》
主唱：柳應廷 Jer Lau
作曲 / 編曲 / 監製：王雙駿
填詞：小克
唱片公司：大國文化 / ViuTV
#柳應廷 #砂之器 #王雙駿 #小克 #大國文化 #ViuTV #派台歌 #新歌 #廣東歌 #SMARTreview #論盡樂評